Olaug og Helge Terje
Helge Terje er fødd og oppvaksen i Bergsdalen. Olaug har budd her i over 30 år.
Me trivst her i Bergsdalen 450 meter over havet, i lag med 15 mjølkekyr og pusane våre.
Borna våre er no vaksne, men Ingrid & Kristian, Kristina & Øystein, Åshild og Erling hjelper alle til i gardsdrifta, og når me arrangerer selskap og konferansar.
Velkomne til oss!
Kanskje det var akkurat slik å koma på besøk til bestemor då du var liten? God mat og gode senger i herlege, stressfrie omgjevnader ventar på deg.
Fjelldalen mellom Dale og Voss
Bergsdalen er fjelldalen som går mellom Dale i Vaksdal og Bulken i Voss. Grensa mellom Vaksdal og Voss går ved Hamlagrø, i slutten av dalen før nedstigninga mot Bulken.
Den 45 kilometer lange vegen gjennom dalen, er den gamle hovudvegen mellom Bergen og Voss før E16 stod klar. No er han veg til alle fastbuande og eigarar av fritidsbustader i dalen, i tillegg til omkøyringsveg. Gjennom dalen finn du plassar som Storefossen, Fosse, Øye, Berge, Småbrekke og Hamlagrø for å nemna nokre. Gjennom dalen renn Bergsdalselva. Det er store og små vatn i dalen, som Hamlagrøvatnet, Småbrekkevatnet, Bergsvatnet, og Storefossdammen.
Det Bergsdalen kanskje er aller mest kjend for, er naturen og fjellområda. Frå vegen gjennom dalen kan du nå store fjellområde på begge sider av vegen. På nordsida av vegen er det toppar som Dystingen, Blåsåta og Mykkeltveitveten. Frå fjellområdet her kan du også gå ned mot Bolstad eller Evanger. Dei største fjellområda er derimot på sørsida av vegen. Her finn du fjell som Gløvret, Bukkafjellet, Fuglafjellet, Skrott og mange fleire. Fjellpartiet strekkjer seg frå Bergsdalen, mot Vaksdal, Tysse, Øystese og Hardangerfjorden.
Det er langt mellom husa i fredelege Bergsdalen.
